ᐊᒥᓱᒻᒪᕆᐊᓗᐃᑦ ᑕᑯᔭᖅᑐᐃᓯᒪᓚᐅᖅᑐᑦ ᒥᖅᓱᖅᑕᐅᓯᒪᔪᓂᒃ ᓴᓇᙳᐊᖅᑕᐅᓯᒪᔪᓂᒡᓗ ᐊᒻᒪᓗ ᐊᓐᓄᕌᓕᐊᖑᓯᒪᔪᑦ ᐊᑐᖅᑕᐅᑉᓗᑎᒃ ᓴᖅᑭᔮᖅᑎᑕᐅᑎᓪᓗᒋᑦ ᐅᒍᑎᖃᑦᑕᓚᐅᕆᑉᓗᑎᒃ 9-ᒋᔭᖓᓂᒃ ᑭᕙᓪᓕᕐᒥ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᑎᓪᓗᒋᑦ ᑲᖏᖅᖠᓂᕐᒥ ᓯᑎᐱᕆ 25-ᒥ.
ᓴᖅᑭᔮᓪᓚᕆᓚᐅᖅᑐᑦ ᑭᕙᓪᓕᕐᒥ ᒥᖅᓱᖅᑏᑦ ᓴᓇᙳᐊᖅᑏᓪᓗ ᓂᐅᕕᐊᒃᓴᖏᑦ ᓂᐅᕕᖅᑕᐅᖃᑦᑕᖁᑉᓗᒋᑦ ᖁᕝᕙᖅᑎᖅᑕᐅᖁᑉᓗᒋᓪᓗ ᐱᓕᕆᐊᖏᑦ ᑕᐃᒪᐃᓕᐅᕈᑕᐅᖏᓐᓇᖅᑐᑦ ᑭᕙᓪᓕᕐᒥ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᓕᕌᖓᑕ ᐅᑭᐅᓂᒃ ᖄᖏᖅᓯᒪᔪᓂᒃ, ᓴᓇᙳᐊᖅᑏᑦ ᒥᖅᓱᖅᑏᓪᓗ ᐃᓕᓐᓂᐊᖅᑎᑦᑎᕙᒃᖢᑎᒃ ᐱᓕᕆᐊᕆᖃᑦᑕᖅᑕᒥᓂᒃ ᐊᕐᕌᒍᑕᒫᒃᑯᑦ.
ᐅᑭᐅᖅ ᐊᑎᓕᐅᖅᓯᒪᔪᑦ ᓴᓇᙳᐊᖅᑏᑦ ᒥᖅᓱᖅᑏᑦ ᐃᓕᓐᓂᐊᖅᑎᑕᐅᓚᐅᖅᑐᑦ ᐊᔾᔨᓕᐅᕆᓂᕐᒥᒃ.
ᓄᓇᕗᑦ ᒐᕙᒪᒃᑯᖏᑦᑕ ᐅᖃᐅᔾᔨᒋᐊᖅᑎᖓ ᒥᖅᓱᕐᓂᒃᑯᑦ ᓴᓇᙳᐊᕐᓂᒃᑯᓪᓗ ᐃᓕᖅᑯᓯᑐᖃᑎᒍᓪᓗ ᑮᓇᐅᔾᔭᒃᓴᕈᑎᒃᑯᑦ, ᑎᕇᓯ ᑐᖏᓕᒃ, ᐅᖃᓚᐅᖅᑐᖅ ᒥᖅᓱᖅᑏᒡᒎᖅ ᓴᓇᙳᐊᖅᑏᓪᓗ ᓂᐅᕕᐊᒃᓴᖃᖅᑎᑕᐅᔭᕌᖓᑕ ᑕᐃᒪᐃᓕᐅᖅᑎᓪᓗᒋᑦ ᑲᖏᖅᖠᓂᕐᒥ ᐊᑑᑎᖃᓪᓚᕆᓲᖅ ᐊᒥᓱᑦ ᑭᕙᓪᓕᕐᒥ ᒥᖅᓱᖅᑏᑦ ᓴᓇᙳᐊᖅᑏᓪᓗ ᐊᑑᑎᖃᖅᑐᒃᑯᑦ ᖁᕝᕙᖅᑎᕆᔪᓐᓇᖃᑦᑕᙱᒻᒪᑕ ᓴᖅᑭᔮᖅᑎᑦᑎᔪᓐᓇᖃᑦᑕᙱᒻᒪᑕᓗ ᐱᓕᕆᐊᒥᓂᒃ, ᐃᑕᖃᙱᓪᓚᑦᑖᖅᑐᒃᓴᐅᔪᓪᓘᓐᓃᑦ.
ᑐᖏᓕᒃ ᐅᖃᖅᖢᓂ ᓂᐅᕕᐊᒃᓴᖃᑲᐅᑎᒋᔪᓐᓇᖃᑦᑕᖅᖢᑎᒎᖅ, ᐃᓚᐅᖃᑕᐅᓂᖃᖅᖢᑎᒃ ᓂᐅᕕᐊᒃᓴᖃᖃᑦᑕᕐᓂᕐᒧᑦ ᐱᕕᒃᓴᖃᖃᑦᑕᕐᒥᔪᑦ ᐅᖃᖃᑎᖃᕈᓐᓇᕐᓂᕐᒧᑦ ᐱᓕᕆᖃᑎᖃᕈᓐᓇᕐᓂᕐᒧᓪᓗ ᐃᓄᖕᓂᒃ ᓂᐅᕕᖅᑎᒋᓕᕋᔭᖅᑕᖏᓐᓂᒃ ᖃᑯᒍ.
Darrell Greer/NNSL photo
ᐅᖃᖅᖢᓂᓗ ᐱᕕᒃᓴᖃᕐᓂᐅᖃᑦᑕᕐᒥᔪᖅ ᑕᑯᔪᓐᓇᕐᓂᕐᒧᑦ ᐊᓯᖏᑦᑕ ᓴᓇᕙᒃᑕᖏᓐᓂᒃ, ᐃᑲᔫᑕᐅᕙᒃᖢᓂᓗ ᐊᓯᐊᒍᑦ ᓴᓇᔪᓐᓇᖅᓯᓇᔭᕐᓂᕐᒧᑦ ᐱᕚᓪᓕᕈᑎᒃᓴᒃᑯᑦ.
“ᓴᓇᔭᐅᓯᒪᔪᑦ ᓂᐅᕕᐊᒃᓴᐅᖃᑦᑕᖅᑎᓪᓗᒋᑦ ᐃᓄᐃᑦ ᑕᑯᔪᓐᓇᖃᑦᑕᖅᑐᑦ ᓱᓇᓂᒃ ᓴᓇᙳᐊᖅᑏᑦ ᒥᖅᓱᖅᑏᑦ ᓴᓇᖃᑦᑕᕐᒪᖔᑕ ᐊᒻᒪᓗ ᓱᓇᓂᒃ ᐊᔪᙱᓐᓂᖃᕐᒪᖔᑕ,” ᑕᐃᒪᓐᓇ ᐅᖃᖅᖢᓂ ᑐᖏᓕᒃ. “ᐃᓕᓐᓂᐊᖅᑎᑦᑎᓂᐅᕙᒃᑐᑦ ᐱᒻᒪᕆᐊᓘᖕᒥᔪᑦ ᐃᑲᔫᑕᐅᖃᑦᑕᕐᒪᑕ ᓴᓇᙳᐊᖅᑏᑦ ᒥᖅᓱᖅᑏᓪᓗ ᐊᔪᕈᓐᓃᖅᐹᓪᓕᕈᓐᓇᕐᓂᖏᓐᓄᑦ ᖁᕝᕙᖅᑎᕆᔪᓐᓇᕐᓂᕐᒧᑦ ᑐᓴᖅᑎᑦᑎᔪᓐᓇᕐᓂᕐᒧᓪᓗ ᐱᓕᕆᐊᒥᓂᒃ, ᓴᖅᑭᑎᑦᑎᔪᓐᓇᕐᓂᕐᒧᓪᓗ ᐱᐅᓂᖅᓴᓂᒃ ᓂᐅᕕᐊᒃᓴᖃᖃᑦᑕᕐᓂᕐᒧᑦ ᐱᕕᒃᓴᕆᔭᐅᔪᓂᒃ.”
ᑐᖏᓕᒃ ᐅᖃᖅᖢᓂ ᐊᑕᐅᓯᕐᒥᒎᖅ ᐊᑐᓂ ᓄᓇᓕᖕᓂ ᑲᖏᖅᖠᓂᓕᐊᖅᑎᑦᑎᓲᑦ ᑭᕙᓪᓕᕐᒥ ᓇᖕᒥᓂᓖᑦ ᐱᓕᕆᕝᕖᓪᓗ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᑎᓪᓗᒋᑦ ᐅᑭᐅᑕᒫᒃᑯᑦ.
ᐅᖃᖅᖢᓂᓗ ᒪᕐᕉᖕᓂᒎᖅ ᑎᑭᑎᑦᑎᔪᓐᓇᓚᐅᖅᑐᑦ ᓇᐅᔮᓂ ᑕᒡᕙᓂ ᐅᑭᐅᒥ ᐃᒡᓗᓕᒑᕐᔪᖕᒥ ᑎᑭᑦᑐᓐᓇᖅᑐᖃᓚᐅᙱᒻᒪᑦ.
“ᐊᑕᐅᓯᕐᒥᒃ ᑐᒃᓯᕋᖃᑦᑕᖅᑐᒍᑦ ᐊᕐᕕᓂᓕᐅᔪᓂᒃ ᐊᓯᖏᓐᓂᒃ ᓄᓇᓕᖕᓂ ᑭᕙᓪᓕᕐᒥ ᐊᕐᕌᒍᑕᒫᒃᑯᑦ ᐃᓚᐅᖃᑕᐅᑎᑉᐸᒃᖢᒋᑦ ᑕᓪᓕᒪᐅᔪᓂᒃ ᑲᖏᖅᖠᓂᕐᒥᐅᑕᓂᒃ ᐃᓚᐅᖃᑕᐅᑎᑉᐸᒃᑕᑉᑎᓐᓂᒃ,” ᑕᐃᒪᓐᓇ ᐅᖃᖅᖢᓂ. “ᐊᓯᖏᑦ ᒥᖅᓱᖅᑏᑦ ᓴᓇᙳᐊᖅᑏᑦ ᑲᖏᖅᖠᓂᕐᒥᐅᑕᑦ ᓂᐅᕕᐊᒃᓴᖃᖃᑦᑕᕈᓐᓇᕐᒥᔪᑦ, ᑭᓯᐊᓂ ᐃᓕᓐᓂᐊᖅᑎᑕᐅᔪᓄᑦ ᐅᐸᒍᑎᔭᕆᐊᖃᖃᑦᑕᙱᑦᑐᑦ.”
ᑐᖏᓕᒃ ᐅᖃᖅᖢᓂ, ᓇᖕᒥᓂᕉᖅ ᐅᑭᐅᖅ ᓂᐅᕕᐊᒃᓴᖅ ᐱᐅᒋᓪᓚᕆᓚᐅᖅᑕᖏᑦ.
ᐅᖃᖅᖢᓂ ᑕᑯᔪᒪᒐᔪᒃᑐᕉᖅ ᐃᓄᖕᓂᒃ ᖁᕕᐊᓱᒃᑐᓂᒃ ᑕᑯᔭᕆᐊᒃᓴᖅ ᐊᔾᔨᒌᙱᑦᑑᑕᐅᔪᓂᒃ ᓴᓇᔭᐅᓯᒪᔪᓂᒃ ᐊᑐᓂ ᓄᓇᓕᖕᓂ.
“ᑕᑯᖃᑦᑕᖅᑕᖅᐳᑦ ᐊᔾᔨᒌᙱᑦᑑᑕᐅᖏᓐᓇᓲᑦ ᐅᑭᐅᑕᒫᖅ ᑕᐃᒪᓐᓇ ᑕᑯᔪᒪᖃᑦᑕᕋᑉᑕ.
“ᑭᓯᐊᓂ, ᐅᖃᕈᒪᔪᖓ, ᐊᑕᐅᓯᖅ ᓴᓇᔭᐅᓲᖅ ᑕᑯᔪᒪᓪᓚᕆᓚᐅᖅᑕᕋ ᐅᑭᐅᖅ.
“ᐊᑕᐅᓯᕐᒥᒡᓘᓐᓃᑦ ᒥᖅᓱᖅᑎᒥᒃ ᑲᒥᓕᐅᖅᓯᒪᔪᖃᓚᐅᙱᑦᑐᖅ ᓂᐅᕕᐊᒃᓴᓂᒃ ᐅᑭᐅᖅ ᐊᒻᒪᓗ ᑲᒥᖕᓂᒃ ᕿᓂᖅᑐᖃᕋᔪᒃᖢᓂ,” ᑕᐃᒪᓐᓇ ᐅᖃᖅᖢᓂ.