Skip to content

ᐃᓱᓕᑉᐸᓪᓕᐊᓂᖃᓕᖅᐳᖅ

ᑕᐃᒪ, ᐅᖃᓕᒫᖅᑎᐅᖃᑦᑕᖅᑐᓄᑦ, ᐅᑎᖅᓯᒪᓕᖅᐳᖓ ᑲᖏᖅᖠᓂᕐᒧᑦ ᕿᓚᒥᑯᓗᒡᓗ ᐅᑭᐅᓂᒃ ᐊᕙᑎᓂᒃ ᐊᓂᒍᐃᓂᐊᓕᖅᐳᖓ ᑭᕙᓪᓕᕐᒥ ᓂᐱᕗᒃᑯᓐᓂ ᐱᕙᓪᓕᐊᔪᓕᕆᔨᐅᓯᒪᓕᖅᖢᖓ.
ᐅᒃᐱᕐᓇᖏᒻᒪᕆᒃᐳᑦ ᐅᑭᐅᑦ ᐊᕙᑎᑦ ᐊᓂᒍᖅᓯᒪᓕᐊᓂᖕᒪᑕ ᕿᓚᒥᒻᒪᕆᐊᓗᒃ. ᐅᖃᕈᓐᓇᖅᖢᖓᓗ ᑲᑉᐱᐊᓱᒐᓚᒃᐳᖓ ᕼᐋᑭᖅᑐᓂᒃ ᕼᐋᑭᖅᑐᓕᕆᔨᐅᓂᐊᖏᓕᕋᒪ ᕼᐋᑭᕐᓇᐅᓂᐊᖅᑐᒥ.
ᑕᐃᒪ ᕼᐋᑭᕆᐊᓕᕐᒥᒃᐸᑕ ᑲᖏᖅᖠᓂᕐᒥ, ᐊᔾᔨᐅᓂᐊᖏᑉᐳᖅ ᑕᐅᑐᑐᐃᓐᓇᕐᓂᐊᕋᒪ ᐱᓐᖑᐊᖅᑐᓂᒃ ᐃᓚᐅᖏᓪᓗᑕᓗ ᓯᑯᒥ.
ᐅᖃᓕᒫᖃᑦᑕᖅᑐᓄᑦ ᐅᖃᕈᒪᑉᓗᖓ. ᑕᒪᐃᓐᓄᑦ ᑭᕙᓪᓕᕐᒥᐅᓄᑦ ᐊᓈᓇᓂᒃ ᐃᓱᒪᖃᖃᑕᐅᓚᐅᖅᑐᓂᒃ ᑐᒃᓯᐅᔾᔨᖃᑦᑕᓚᐅᖅᑐᓂᒡᓗ Cape Breton ᐋᓐᓂᐊᕐᕕᖕᒦᑎᓪᓗᒍ, ᖁᔭᓐᓇᒦᒃ ᐆᒻᒪᑎᓗᒃᑖᒻᓂᑦ.
ᐊᓈᓇᒐ ᖃᓄᐃᖏᑉᐸᓪᓕᐊᓕᖅᐳᖅ ᐅᑎᖅᓯᒪᓕᖅᑎᓪᓗᖓ ᐱᓕᕆᐊᒻᓄᑦ ᐊᐅᔭᐅᓂᐊᖅᑐᒥᓗ 2018-ᒥ ᐱᖃᑎᒋᒃᑲᓐᓂᕐᓂᐊᖅᐸᕋ. ᑕᐅᓄᖓᐅᑐᐃᓐᓇᕆᐊᖃᕐᓂᐊᖅᐳᖓᓗ ᑲᓇᖕᓇᒥᐅᓄᑦ ᑕᕆᐅᑉ ᓯᒡᔭᖓᓂᒥᐅᓄᑦ ᖁᕕᐊᓱᒃᕕᒃᓯᐅᖃᑎᒋᔭᖅᑐᕐᓗᒍ ᐊᓈᓇᒐ.
ᑐᒃᓯᐊᕐᓂᓯ ᑐᓴᖅᑕᐅᑦᓯᐊᓚᐅᖅᐳᑦ, ᖁᔭᓐᓇᒦᒃ.
ᐃᓱᓕᑉᐸᓪᓕᐊᓂᐊᓕᖅᐳᖅ 2017 ᑕᖅᑭᓂ ᓯᑕᒪᐅᓂᐊᖅᑐᓂ.
ᖁᕕᐊᓱᖏᑉᐸᓪᓕᐊᕗᖅ ᖃᒪᓂ'ᑐᐊᒥ ᐅᔭᕋᒃᑕᕆᐊᑦ Agnico Eagle Mines ᖃᓄᐃᓕᐅᓚᐅᕐᓂᖏᓐᓄᑦ ᖃᒪᓂ'ᑐᐊᒥ ᐃᒃᐱᒋᔭᐅᓚᐅᖅᑐᑦ ᓱᓕ ᖁᕕᐊᓱᖏᔾᔪᑎᒋᔭᐅᕗᑦ, ᑖᒃᑯᐊ Whale Tailᒥ ᒎᓗᑎᓯᐅᖅᑐᑦ, ᐱᓕᕆᖃᑎᖃᖏᑐᐃᓐᓇᕆᐊᖃᖅᐳᑦ ᐊᕙᑎᒥᐅᑕᓕᕆᓂᕐᒧᑦ, ᐆᒪᔪᓕᕆᓂᕐᒧᑦ ᓄᓇᓕᖕᓂᒃ ᐱᓕᕆᖃᑎᖃᕐᓂᕐᒧᓪᓗ.
ᓄᓇᕗᒥ ᐃᓕᓐᓂᐊᖅᑎᑦᓯᔨᓂᒃ ᐊᒥᒐᖅᓯᕙᓪᓕᐊᕗᑦ ᐃᓕᓐᓂᐊᖅᑎᑎᔨᒃᓴᓪᓗ ᐃᓕᓐᓂᐊᖅᐸᓪᓕᐊᓂᖏᑦ ᐊᖑᒻᒪᑎᖏᓕᖅᖢᑎᒃ.
ᑭᕙᓪᓕᕐᒥ ᐃᓕᓐᓂᐊᕐᕕᑦ ᐱᓕᕆᔨᓂᒃ ᐊᒥᒐᐃᕗᑦ ᓄᑖᒥ ᐃᓕᓐᓂᐊᕐᓇᐅᓂᐊᖅᑐᖅ ᐱᒋᐊᕐᓂᐊᓕᖅᑎᓪᓗᒍ. ᐊᒃᓱᕈᕐᓇᕐᓂᐊᖅᑐᒃᓴᐅᕗᖅ ᐊᕐᕌᒍᖓᑦ, ᐱᓇᓱᐊᕈᓯᓂ ᖃᐃᔪᓂ ᐃᓕᓐᓂᐊᖅᑎᑦᓯᔨᑖᖏᑐᐊᖅᐸᑕ.
ᐃᓚᖏᓪᓗ ᑐᓴᖅᑕᐅᓯᒪᕗᑦ ᐃᓕᓐᓂᐊᖅᑎᑎᔨᑦᓯᐊᕙᐃᑦ ᑭᖑᓪᓕᖅᐹᖅᓯᐅᕈᒪᓕᕐᒪᑕ ᑭᕙᓪᓕᕐᒥ.
ᑕᒪᒃᑯᐊ ᐊᓯᐅᔨᔭᐅᒋᐊᖃᖏᑉᐳᑦ ᐃᓕᓐᓂᐊᖅᑎᑎᔨᑦ ᐊᔪᖏᑦᑐᓂᒃ ᐱᓕᕆᔨᑖᕆᐊᖃᕋᑉᑕ, ᐱᓗᐊᖅᑐᒥᒃ ᐃᓕᓐᓂᐊᖅᑎᑎᔨᓂᒃ ᐊᐅᑦᓚᑦᓯᐊᕈᓐᓇᖅᑐᓂᓕᒃ, ᓇᒡᓕᖕᓇᖅᑐᓂᒃ ᓇᒡᓕᒍᓱᒃᑐᓂᒡᓗ ᐃᓚᐅᓂᖃᑦᓯᐊᖅᑐᓂᒃ ᓄᓇᓕᖕᓂ.
ᑕᒪᒃᑯᐊ ᐃᓕᓐᓂᐊᖅᑎᑦᓯᔨᑦᓯᐊᕙᐅᖃᑦᑕᖅᑐᑦ ᐊᐅᓪᓚᖅᐸᑕ ᓲᕐᓗ ᑖᖅᑐᖅᓯᐅᓕᕋᔭᖅᐳᒍᑦ ᐃᓕᓐᓂᐊᖅᑎᑕᐅᖃᑦᑕᖏᓕᖅᐸᑕ ᐃᓕᓐᓂᐊᖅᑎᑦ ᐃᓕᓐᓂᐊᕐᓇᐅᑉ ᓯᓚᑖᒍᑦ.
ᑕᐃᒪ ᖃᐅᔨᑎᓚᐅᕐᓚᕗᑦ ᐃᓕᓐᓂᐊᖅᑎᑎᔨᑦ ᑕᒪᕐᒥᒃ ᖁᔭᓐᓇᒦᑦᓯᐊᕋᑉᑎᒍᑦ ᐱᓕᕆᑦᓯᐊᖃᑦᑕᕐᓂᖏᓐᓄᑦ.
ᖁᕕᐊᓇᖅᐳᖅ ᐱᓕᕆᓕᕐᒥᒐᒪ ᑕᑯᓐᓇᕈᒪᑉᓗᒍᓗ ᐱᕙᓪᓕᐊᓂᖓ ᐃᓱᓕᑉᐸᓪᓕᐊᓂᖓ 2017 ᐃᓕᑉᓯ ᐱᖃᑎᒋᓗᓯ.