Skip to content

ᓄᓇᕗᒥᐅᑦ ᐸᕐᓇᓕᖅᑐᑦ ᓂᕈᐊᕐᓂᐊᕐᓂᖏᓐᓄᑦ

ᓂᕈᐊᖅᑐᓕᕆᔨᒃᑯᑦ ᓄᓇᕗᒥ ᐱᓕᕆᔪᒻᒪᕆᐅᓕᖅᑐᑦ, ᑭᖑᓪᓕᖅᐹᒥ ᑕᓪᓕᒪᓂᒃ ᐃᓕᓴᐃᔪᑎᖃᖃᑦᑕᕐᒪᑕ ᑖᒃᑯᓂᖓ 22-ᓂᒃ ᓄᓇᓕᖕᓂ ᓂᕈᐊᖅᑎᑦᑎᔨᐅᓂᐊᖅᑐᓂᒃ ᐊᒻᒪᓗ 31-ᓂᒃ ᐃᑲᔪᖅᑎᐅᓂᐊᖅᑐᓂᒃ ᓂᕈᐊᖅᑐᓕᕆᔨᓄᑦ ᓄᓇᓕᖕᓂ.

ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓ ᑕᔅᑎᓐ ᕗᕇᓚᓐ, ᓴᐅᒥᐊᓂ, ᐃᓕᓴᐃᑎᓪᓗᒍ 8-ᓂᒃ ᓄᓇᓕᖕᓂ ᓂᕈᐊᖅᑐᓕᕆᔨᐅᓂᐊᖅᑐᓂᒃ ᐃᑲᔪᖅᑎᐅᓂᐊᖅᑐᓂᒃᓗ ᑭᖑᓪᓕᖅᐹᒥ ᑕᓪᓕᒪᐃᖅᓱᖅᖢᑎᒃ ᐃᓕᓴᖃᑦᑕᕐᒪᑕ ᑕᒪᐃᑕ ᓄᓇᕗᒥᐅᑦ ᓂᕈᐊᖅᑎᑕᐅᓂᐊᓕᕌᖓᑕ ᐅᒃᑑᐸ 30-ᒥ. ᐅᑯᐊᖑᓂᐊᖅᑐᑦ: ᐃᖃᓗᖕᒥᐅᑦ-ᓯᓈᖓᓂᒥᐅᓄᑦ ᓂᕈᐊᖅᑐᓕᕆᔨ ᓲᓴᓇ ᖃᓪᓗᑦᓯᐊᖅ, ᐃᖃᓗᖕᒥᐅᑦ-ᒪᓂᕋᔭᖓᓂᒥᐅᓄᑦ ᓂᕈᐊᖅᑐᓕᕆᔨ ᐃᓖᓴ ᕿᓚᕝᕙᖅ, ᖁᑦᑎᒃᑐᒥᐅᓂ (ᖃᐅᓱᐃᑦᑐᒥ) ᐃᑲᔪᖅᑎ ᓂᕈᐊᖅᑐᓕᕆᔨᒧᑦ ᐋᓇ ᓄᖕᖓᖅ, ᐃᖃᓗᐃᑦ-ᑕᓯᓗᖕᒥᐅᓄᑦ ᐃᑲᔪᖅᑎ ᓂᕈᐊᖅᑐᓕᕆᔨᒧᑦ ᑳᓴᓐ ᓲᓯ, ᖁᑦᑎᒃᑐᒥᐅᓄᑦ (ᐊᐅᓱᐃᑦᑐᒥ) ᐃᑲᔪᖅᑎ ᓂᕈᐊᖅᑐᓕᕆᔨᒧᑦ ᓗᐃᓴ ᑲᒃᑭᒃ, ᐃᖃᓗᐃᑦ-ᓯᓈᖓᓂᒥᐅᓄᑦ ᐃᑲᔪᖅᑎ ᓂᕈᐊᖅᑐᓕᕆᔨᒧᑦ ᑉᓖᒃ ᕗᐃᓪᓴᓐ ᐊᒻᒪᓗ ᐃᖃᓗᖕᓂ-ᓂᐊᖁᓐᖒᒥᐅᓄᑦ ᐃᑲᔪᖅᑎ ᓂᕈᐊᖅᑐᓕᕆᔨᒧᑦ ᓖᑎᐊ ᐊᐃᐱᓕ.

ᓄᓇᕗᒥ ᓂᕈᐊᕕᒃᔪᐊᕐᓂᐊᓕᕐᒥᖕᒪᑕ, ᐊᑭᖃᕐᓗᓂ ᐃᒻᒪᖄᒎᖅ ᑎᑭᓪᓗᒍ $1.2-ᒥᓕᐊᓐᑖᓚᕌᕐᓂᐊᖅᑐᖅ, ᓂᕈᐊᕈᑎᒋᓂᐊᖅᑕᖓᓄᑦ ᐸᕐᓇᒃᖢᑎᒃ ᐅᒃᑑᐸ 30-ᒧᑦ.

ᓯᑎᐱᕆ 25-ᒥ, ᑎᑎᕋᕐᒥᒃ ᑐᓂᐅᖅᑲᐃᓕᕐᓂᐊᖅᑐᖓ ᓇᓗᓇᐃᔭᐃᓯᒪᔪᒥᒃ ᑭᒃᑯᓐᓂᒃ ᐊᑐᓂ ᓄᓇᓕᖕᓂ ᓂᕈᐊᖅᑎᑦᑎᔨᖃᕐᓂᐊᕐᒪᖔᑕ, ᓄᓇᕗᒥ ᐊᑐᓂ ᒪᓕᒐᓕᐅᖅᑎᖃᕐᒪᑕ 22-ᓂᒃ. ᓂᕈᐊᕋᓱᐊᕐᓂᐊᕐᒪᑕ ᐊᑐᓂ ᑖᒃᑯᓇᓂ ᓄᓇᓕᖕᓂ ᒪᓕᒐᓕᐅᕐᕕᖕᒥ ᑲᑎᒪᔨᒃᓴᖏᓐᓂᒃ ᓯᕗᓂᖓᓂ ᓇᓗᓇᐃᔭᖅᑕᐅᒋᐊᓖᑦ ᑭᒃᑰᓂᐊᕐᒪᖔᑕ ᓂᕈᐊᖅᑕᐅᓇᓱᐊᕈᒪᔪᑦ,” ᐅᖃᓚᐅᖅᑐᖅ ᐊᖓᔪᖅᑳᖓᑦ ᓂᕈᐊᖅᑐᓕᕆᔨᒃᑯᑦ ᑕᔅᑎᓐ ᕗᕇᓚᓐ.

ᐊᑐᓂ ᓄᓇᓖᑦ ᓂᕈᐊᖅᑎᑦᑎᔨᖃᕐᓂᐊᖅᑐᑦ ᓄᓇᓕᖓᓂ ᐊᒡᓚᒡᕕᖃᕐᓗᓂ ᑐᕌᕐᕕᖃᕐᓗᓂᓗ.

ᐃᓚᖏᓐᓂ ᓄᓇᓕᖕᓂ ᐊᒡᓚᒡᕕᖃᖃᑦᑕᖏᒻᒪᑕ ᓱᓕ, ᑭᓯᐊᓂᓕ ᐃᑲᔪᖅᑎᖃᐅᕐᓂᐊᖅᑐᑦ ᓂᕈᐊᖅᑐᓕᕆᔩᑦ ᓂᕈᐊᖅᑕᐅᓇᓱᐊᕈᒪᔪᓂᒃ ᑎᑎᖅᑲᓕᕆᔨᐅᓗᑎᒃ,” ᐅᓂᒃᑳᕆᓪᓗᓂ ᕗᕇᓚᓐ.

ᐃᒫᖓᐃ, ᓂᕈᐊᖅᑕᐅᕕᒃᒥ ᓇᑦᓯᓕᒃᒥᐅᓄᑦ, ᑰᒑᕐᔪᖕᒥᐅᑦ ᓄᓇᓕᖓ ᐃᓚᐅᑎᓪᓗᒍ ᑕᓗᕐᔪᐊᕐᓗ, ᐊᒡᓚᒡᕕᖃᓚᖓᔪᑦ ᑕᓗᕐᔪᐊᒥ ᑭᓯᐊᓂ.

ᕗᕇᓚᓐ ᐅᖃᕆᓪᓗᓂ ᓂᕈᐊᖅᑕᐅᓇᓱᐊᖅᑐᑦ ᑐᓴᕐᓇᖅᑐᑎᒎᖅᑎᑦᑎᖃᑦᑕᕈᓐᓇᕐᓂᐊᖅᑐᑦ ᐱᒋᐊᕈᓐᓇᖅᑐᒃ ᑕᒪᑐᒪᓂ ᐱᓇᓱᐊᕈᓯᑦᑎᓐᓂ.

ᓂᕈᐊᖅᑕᐅᓇᓱᐊᖅᑐᑦ ᓇᓗᓇᐃᔭᕆᐊᓖᑦ ᓂᕈᐊᖅᑕᐅᓇᓱᐊᕐᓂᐊᕐᓂᕐᒥᓂᒃ ᓄᓇᓕᖕᒥᓂ ᓯᑎᐱᕆ 25-ᒥ. ᐃᓱᓕᕝᕕᖃᖅᑐᖅ 2-ᒧᐊᖅᐸᑦ ᐅᓐᓄᒃᓴᒃᑯᑦ ᓄᓇᓕᖓᓂ ᓯᕿᖑᔭᖓᑦ ᒪᓕᒃᓗᒍ ᓯᑎᐱᕆ 29-ᒥ, ᐊᒻᒪᓗ ᐃᓱᓕᕝᕕᖃᕆᓪᓗᑎᒃ ᐃᓚᐅᔪᒪᔪᓐᓃᑦᑐᑦ ᑕᒪᑐᒪᓂᓴᐃᓐᓇᖅ ᐅᓪᓗᒥ ᓇᓗᓇᐃᖅᓯᒋᐊᓖᑦ. ᑭᒃᑯᑐᐃᓐᓇᐃᑦ ᓄᖅᑲᖅᑎᑦᑎᓐᓂᖏᑉᐸᑕ ᓂᕈᐊᖅᑕᐅᓇᓱᐊᕈᒪᓚᐅᖅᖢᑎᒃ $200 ᐅᑎᖅᑎᑕᐅᔮᖏᑦᑐᖅ ᐴᖅᓯᒪᑎᑕᖓᑦ.

ᑭᒃᑯᑐᐃᓐᓇᐃᑦ ᓂᕈᐊᒐᒃᓴᖑᕈᓐᓇᖅᑐᑦ, ᓂᕈᐊᕈᓐᓇᖅᑐᑦ. ᑲᓇᑕᒥᐅᑕᐅᓗᑎᒃ, 18-ᓂᒃ ᐅᑭᐅᖃᓕᖅᑐᑦ ᐅᖓᑖᓄᓪᓘᓐᓃᑦ ᑕᒪᑐᒪᓂ ᓂᕈᐊᕐᕕᐅᑉ ᐅᓪᓗᐊᓂ, ᓄᓇᕗᒥᐅᖑᒋᐊᓖᑦ ᐅᑭᐅᓕᒫᒥᒃ, ᐊᒻᒪᓗ ᓂᕈᐊᖅᑕᐅᓇᓱᐊᕈᓐᓇᕐᓗᑎᒃ,” ᐅᖃᕆᓪᓗᓂ ᕗᕇᓚᓐ.

ᑭᒃᑯᑐᐃᓐᓇᐃᑦ ᓂᕈᐊᒐᒃᓴᖑᕈᓐᓇᖏᑦᑐᑦ ᒪᑯᐊ ᓂᕈᐊᖅᑕᐅᓇᓱᐊᖅᑐᑦ ᑮᓇᐅᔭᓕᕆᔨᖏᑦ ᐅᕝᕙᓘᓐᓃᑦ ᑭᖑᓪᓕᖅᐸᒥ ᓂᕈᐊᕐᓇᖅᑎᓪᓗᒍ ᓂᕈᐊᖅᑕᐅᓇᓱᐊᓚᐅᖅᑐᑦ 2013-ᒥ ᐊᒻᒪᓗ ᑖᒃᓰᔭᐃᔭᐅᑏᑦ ᐅᓂᒃᑲᖓᓂᒃ ᑐᓂᓯᓯᒪᖏᑦᑐᑦ ᓱᓕ ᑕᒪᑐᒪᓂ ᐅᓪᓗᓂ 60-ᓂ.

ᐃᒻᒥᒃᑰᖅᖢᑎᒃ ᐊᑐᐊᒐᖃᖅᑎᑕᐅᖕᒪᑕ ᒐᕙᒪᑎᒃᑯᓐᓂ ᐃᖅᑲᓇᐃᔭᖅᑏᑦ, ᓄᓇᕗᒥ ᑲᓇᑕᓕᒫᒥᓗ.

ᓂᕈᐊᖅᑕᐅᓇᓱᐊᕐᓂᐊᕈᑎᒃ ᐃᖅᑲᓇᐃᔭᒥᓂᑦ ᓄᖅᑲᖓᓚᐅᑲᒋᐊᓖᑦ. ᑐᓴᕆᐊᓪᓚᒃᑲᓐᓂᕈᒪᒍᕕᑦ ᑕᒪᑐᒧᖓ, ᐅᖃᓪᓚᒍᓐᓇᖅᑐᑦ ᐃᖅᑲᓇᐃᔭᕐᕕᒋᔭᒥᓄᑦ,” ᐅᖃᕆᓪᓗᓂ ᕗᕇᓚᓐ.

ᐃᖅᑲᓇᐃᔮᒥᓂᑦ ᓄᖅᑲᖓᔪᓐᓇᐅᑎᑖᐸᒌᖅᓯᒪᒋᐊᓖᑦ ᓂᕈᐊᖅᑕᐅᓇᓱᐊᓕᓚᐅᕐᓇᑎᒃ.

ᒫᓐᓇ ᑲᑎᒪᔨᐅᖃᑕᐅᔪᑦ ᑲᓇᑕᐅᑉ ᑲᑎᒪᕕᒃᔪᐊᖓᓂ, ᓯᓂᑐᒃᑯᕕᖕᒥᓗ, ᐃᖅᑲᖅᑐᐃᔩᓪᓗ, ᐊᒻᒪᓗ ᑎᒍᔭᐅᓯᒪᔪᑦ, ᑭᒃᑯᑐᐃᓐᓇᐃᓪᓗ ᐸᓴᔭᒃᓴᖑᖅᑎᑕᐅᓯᒪᔪᑦ ᓂᕈᐊᖅᑐᓕᕆᔪᑏᑦ ᒪᓕᒐᖓᓂᒃ ᓱᕋᐃᓐᓂᕈᑎᒃ ᑕᒪᑐᒪᓂ ᑕᓪᓕᒪᓂ ᐅᑭᐅᓂ, ᓂᕈᐊᒐᒃᓴᐅᔪᓐᓇᖏᑦᑐᑦ.

ᓂᕈᐊᒐᒃᓴᐅᔪᒪᔪᑦ ᑮᓇᐅᔭᓕᕆᔨᖃᕆᐊᓖᑦ ᐊᒻᒪᓗ ᓂᕈᐊᖅᑕᐅᑎᑦᑎᔨᖃᕐᓗᑎᒃ ᐊᐅᓚᑦᑎᔨᖃᕐᓗᑎᒃ ᓂᕈᐊᒐᒃᓴᐅᓂᕐᒥᓄᑦ. ᑮᓇᐅᔭᓕᕆᔪᑎᕕᓂᖏᑦ ᑲᑎᖅᓱᖅᑕᐅᒋᐊᓖᑦ ᓂᕈᐊᖅᑕᐅᓇᓱᐊᕈᑎᒋᓪᓗᒋᑦ ᐊᑐᖅᑕᕕᓂᖏᓐᓄᑦ ᐊᒻᒪᓗ ᑖᓱᒪ ᐃᓅᔪᑎᖏᓐᓄᑦ ᐊᑐᖅᑕᐅᓂᑯᐃᑦ.

ᑕᐃᒪᖓᓂᑦ ᑮᓇᐅᔭᓕᕆᔪᑎᖏᓐᓄᑦ ᐊᐅᓚᑦᑎᔨᖃᕆᐊᖃᖏᑦᑑᒐᓗᐊᑦ ᑭᓯᐊᓂᓕ ᖃᐅᔨᒃᑲᐃᑐᐃᓐᓇᖅᑐᖓ ᐃᓂᒃᓴᖃᖅᑎᑕᐅᔪᖅ ᐃᖅᑲᓇᐃᔭᖅᑎᖏᓐᓂ ᐊᑐᕆᐊᖃᕐᓂᖅᐸᑦ ᑮᓇᐅᔭᓕᕆᔨᒥᒃ,” ᐅᖃᕆᓪᓗᓂ ᕗᕇᓚᓐ.

ᐊᒻᒪᓗᑦᑕᐅᖅ ᑐᓴᐅᒪᔭᐅᔪᒃᓴᐅᖕᒥᔪᖅ, ᓂᕈᐊᒐᒃᓴᐅᔪᖃᕈᓐᓇᖅᑐᖅ ᓇᒥᑐᐃᓐᓇᖅ ᓄᓇᓕᖕᓂ.

ᓂᕈᐊᕈᓐᓇᑐᐊᕈᕕᑦ, ᑕᐃᒪ ᓂᕈᐊᒐᒃᓴᐅᔪᓐᓇᖅᐳᑎᑦ, ᓇᒥᑐᐃᓐᓇᖅ ᑲᑎᒪᔨᖃᕐᕕᐅᔪᓂ ᓄᓇᕗᒥ. ᐃᒫᒃ ᐃᖃᓗᖕᒥᐅᑦ ᑲᑎᒪᔨᐅᒍᒪᒍᓂ ᐊᓯᖏᓐᓄᑦ ᓄᓇᓕᖕᓄᑦ ᓂᕈᐊᒐᒃᓴᐅᔪᓐᓇᖅᑐᑦ. ᑭᓯᐊᓂᓕ ᑕᐃᑲᓂ ᓄᓇᓕᖓᓂ ᓂᕈᐊᕈᓐᓇᖏᓪᓗᓂ ᐅᑭᐅᓕᒫᒥᒃ ᐊᖏᕐᕋᖃᖏᓐᓇᒥ,” ᐅᓂᒃᑳᕆᓪᓗᓂ ᕗᕇᓚᓐ.

ᓂᕈᐊᖅᑐᓕᕆᔨᒃᑯᑦ ᓄᓇᕗᒥ ᐃᖅᑲᓇᐃᔭᖅᑎᑖᖃᑦᑕᕐᒪᑕ ᐃᒻᒪᖄ 160-ᓂᒃ ᑕᐃᒪᖓᓂᑦ ᓂᕈᐊᖅᑐᖃᕐᓂᐊᓕᕌᖓᑦ ᐃᖅᑲᓇᐃᔭᖅᑎᒃᓴᓂᒃ.