ᑲᖏᖅᑐᒑᐱᖕᒥᑦ ᐃᓕᓴᖅᓯᕕᒃ ᑲᑐᔾᔨᖃᑎᒌᒃᑯᑦ ᐃᓄᐃᑦ ᐊᐅᓚᑦᑎᓂᕐᒧᑦ ᑲᑐᔾᔨᖃᑎᒌᖑᔪᖅ ᑐᓂᓯᖃᑦᑕᖅᑐᑦ ᑐᕌᖓᔪᓂᒃ ᑕᒪᐃᓐᓄᑦ ᐃᓅᖃᑎᒌᑦ ᐋᓐᓂᐊᖃᖅᑕᐃᓕᒪᓂᖏᓐᓄᑦ ᓄᓇᓕᖕᒥᑦ.
“ᐃᑲᔪᖃᑦᑕᖅᑐᑦ ᐃᓄᖕᓂᑦ ᐱᑦᑕᐅᔪᒃᑯᑦ ᐱᑦᑕᐅᖏᑦᑐᑰᖏᖔᖅᑐᖅ,” ᐅᖃᖅᑐᖅ ᔭᓂᕗ ᔩᐴᑎ, ᐊᖏᔪᖅᖄᑉ ᐃᓂᖓᓄᐊᓚᐅᖅᑐᖅ ᐊᒻᒪᓗ ᑲᑎᒪᔨᙳᖅᖢᓂ ᑐᑯᒫᖅ-ᒧᑦ ᓇᑦᑎᐊᑦ 1-ᒥᑦ.
ᐱᒋᐊᖅᑎᑕᐅᖃᐅᑕᐅᓚᐅᖅᑐᖅ 1980-ᖏᓐᓂᑦ ᐊᕐᓇᐃᑦ ᐅᖃᓪᓚᐅᔾᔨᓂᕐᒥᒃ ᐱᔨᑦᑎᕋᐅᑎᓂᒃ, ᐃᓕᓴᖅᓯᕕᒃ ᐊᖏᒡᓕᒋᐊᓚᐅᖅᑐᖅ ᑐᓂᓯᖃᑦᑕᖅᖢᓂ ᐊᓈᓇᐅᔪᓄᑦ ᐊᒻᒪᓗ ᓱᕈᓯᖏᓐᓄᑦ, ᐃᓕᓴᕐᓃᑦ ᐅᑉᓗᕐᒥᑦ ᐃᓱᓕᑎᓪᓗᒋᑦ ᖃᓄᐃᓕᐅᖅᑎᑦᑎᑉᓗᑎᒃ, ᐱᖅᖁᓯᕆᔭᐅᔪᒃᑯᑦ ᓴᓇᙳᐊᖅᑎᑦᑎᑉᓗᑎᒃ ᐊᒻᒪᓗ ᒥᖅᓱᖅᑎᑦᑎᑉᓗᑎᒃ, ᑭᑐᑐᐃᓐᓇᓄᑦ ᐅᖃᓕᒫᒐᖃᕐᕕᖃᖅᖢᓂ ᐊᒻᒪᓗ, ᒫᓐᓇᓵᖑᔪᒥᑦ, ᐱᓕᕆᐊᒃᓴᖅ ᓄᓇᓕᖕᒥᐅᑕᐃᑦ ᐊᖑᑏᑦ ᓄᑲᑉᐱᐊᓂᒃ ᐊᑖᑕᖃᙱᑦᑐᓂᒃ ᐊᑖᑕᖏᑦ ᑕᐃᒪᐅᙱᑦᑐᓂᒡᓘᓐᓃᑦ ᓄᓇᓕᐊᕈᔾᔨᖃᑦᑕᕐᓗᑎᒃ ᐃᓕᓴᕐᓂᐊᕐᓗᒋᑦ ᐱᖅᖁᓯᒃᑯᑦ ᐊᔪᙱᓐᓂᖃᕐᓂᕐᒥᒃ.
“ᐱᑦᑕᐅᑦᑎᐊᖅᑐᖅ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᒪᓂᖏᓐᓄᑦ,” ᐅᖃᖅᑐᖅ ᔩᐴᑎ ᓄᑕᐅᓛᖅ ᑐᕌᖓᔪᒥᑦ ᐅᖃᐅᓯᖃᖅᖢᓂ. “ᖃᐅᔨᓯᒪᔪᖓ ᐊᑕᐅᓯᕐᒥᒃ ᓄᑲᑉᐱᐊᒥᒃ, ᐃᒻᒪᖅᖄ 18-ᓂᒃ ᐅᑭᐅᖃᓕᖅᑐᖅ, ᐊᒻᒪᓗ ᑭᓯᕐᒥᐅᖅᖢᓂ ᒪᖃᐃᖃᑦᑕᖅᑐᖅ ᐅᕝᕙᓘᓐᓃᑦ ᐊᓯᖏᓐᓂᒃ ᓄᑲᑉᐱᐊᓂᒃ ᓄᓇᒧᓕᐊᖃᑎᖃᖅᖢᓂ. ᓄᑲᑉᐱᐊᑦ ᐊᑐᖅᐸᓪᓕᐊᓕᖅᑐᑦ ᐃᓕᓚᐅᖅᑕᖏᓐᓂᑦ ᐊᒻᒪᓗ ᐊᓯᖏᓐᓄᑦ ᐃᓕᓐᓂᐊᖅᑎᖦᖢᒋᑦ.”
ᑖᒻᓇ ᐊᑕᐅᓯᑐᐃᓐᓇᐅᔪᖅ ᐆᒃᑑᑎ ᑕᐃᒪᓐᓇᐃᑦᑐᓂᒃ “ᓴᙱᒃᑎᑎᕆᓂᖅ ᖃᓄᐃᖏᑦᑎᐊᕐᓂᕐᒥᒃ ᓄᓇᓕᖕᒥᑦ” ᐃᓅᖃᑎᒌᑦ ᐱᓕᕆᐊᓄᑦ ᐱᔭᒃᓴᐅᑎᒋᔭᖓᑦ.
ᑲᖏᖅᑐᒑᐱᖕᒥᐅᑕᑐᖃᖅ, ᔩᐴᑎ ᐊᒥᓱᓂᒃ ᐃᖅᖃᓇᐃᔮᖃᖅᓯᒪᔪᖅ ᓄᓇᓕᖕᒥᑦ ᒪᒃᑯᒃᑐᐃᑦ ᐱᓕᕆᖃᑎᒋᑉᓗᒋᑦ ᐊᒻᒪᓗ ᐃᓐᓇᕆᔭᐅᔪᑦ, ᐊᒻᒪᓗ ᐃᓕᓴᖅᓯᕕᖕᒧᑦ, ᐃᓚᐅᖃᑕᐅᖃᑦᑕᕆᐊᓕᓵᓚᐅᖅᑐᖅ 2008-ᒥᑦ.
“ᐃᖅᖃᓇᐃᔮᕆᖅᖃᐅᑕᐅᓚᐅᖅᑕᕋ ᐅᖃᐅᓯᓕᕆᓂᖅ ᖁᓗᐊᖅ ᐃᓕᓴᕐᕕᖕᒥᑦ 2002-ᒥᑦ. ᓯᕗᓂᐊᒍᑦ, ᐃᖅᖃᓇᐃᔭᓚᐅᖅᑐᖅ ᐱᖅᖁᓯᓕᕆᕝᕕᖕᒥᑦ ᐃᓕᓴᖅᑏᑦ ᐊᒻᒪᓗ ᐃᓐᓇᕆᔭᐅᔪᑦ ᐱᖃᑎᒋᑉᓗᒋᑦ, ᐃᓄᒃᑎᑑᓕᕆᔨᐅᖃᑦᑕᖅᖢᖓ.”
ᐅᖃᐅᓯᐅᔪᖅ “ᐱᓕᕆᓪᓗᕆᒃᑐᖅ”-ᑐᑦ ᐊᒻᒪᓗ “ᐃᓱᒪᒋᔭᐅᓂᖃᑦᑎᐊᖅᑐᖅ ᓄᓇᓕᖕᒥᐅᑕᖅ ᐊᒻᒪᓗ ᐃᑲᔪᖃᑦᑕᖅᑐᖅ”-ᑐᑦ, ᐃᓚᒋᔭᐅᖃᑦᑕᖅᓯᒪᖕᒥᔪᖅ ᑲᖏᖅᑐᒑᐱᖕᒥᑦ ᑯᐊᐸᒃᑯᑦ ᑲᑎᒪᔨᐊᓚᖏᓐᓄᑦ, ᐃᓕᓴᕐᕕᖕᒥᑦ ᑲᑎᒪᔨᓄᑦ ᐊᒻᒪᓗ ᐋᓐᓂᐊᖃᖅᑕᐃᓕᒪᓂᕐᒧᑦ ᑲᑎᒪᔨᐊᓛᓄᑦ, ᐊᓯᖏᓐᓂᓪᓗ.
ᔩᐴᑎ, ᐃᓕᓴᖅᓯᒪᓂᕐᒧᑦ ᐃᓕᑕᕆᔭᐅᔾᔪᑎᖃᖅᑐᖅ ᓯᓚᑦᑐᖅᓴᕐᕕᒡᔪᐊᖅ ᕆᔾᔭᐃᓇᒥᑦ, ᐃᓕᓴᕐᕕᖕᒥᑦ ᐊᖏᔪᖅᖄᒧᑦ ᑐᖏᓕᕆᔭᐅᓚᐅᖅᑐᖅ ᖁᓗᐊᖅ ᐃᓕᓴᕐᕕᖕᒥᑦ ᐃᓕᓴᖅᓯᕕᖕᒥᑦ ᐊᖏᔪᖅᖄᒃᓴᖅ ᒪᑐᐃᓚᐅᖏᑎᓪᓗᒍ, ᐊᒻᒪᓗ ᐆᒃᑐᕐᒪᒍᑦ ᐃᖅᖃᓇᐃᔮᖅᑖᕆᓚᐅᖅᑕᖓ.
“ᖁᕕᐊᓱᑦᑎᐊᖅᑐᖓ ᐃᓚᐅᓂᐊᕋᒪ ᐊᔪᙱᓐᓂᖃᑦᑎᐊᖅᑐᓂᑦ ᐃᖅᖃᓇᐃᔭᖅᑎᓄᑦ ᐱᓕᕆᐊᕆᓗᒋᑦ ᑐᕌᖓᔪᑦ ᐊᒻᒪᓗ ᐱᔨᑦᑎᕋᐅᑏᑦ ᐊᑐᖅᑐᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐊᒻᒪᓗ ᐃᓅᖃᑎᒌᑦᑎᐊᕐᓂᕐᒥᑦ ᐊᑉᖁᑕᐅᑉᓗᑎᒃ ᒪᒥᓴᕐᓂᕐᒧᑦ,” ᐅᖃᖅᑐᖅ ᔩᐴᑎ ᑐᓴᒐᒃᓴᒥᑦ ᑐᓴᖅᑎᔾᔪᑕᐅᖕᒪᑦ ᓄᑖᖅ ᐃᖅᖃᓇᐃᔮᖓᓂᑦ. “ᓴᕆᒪᓱᖕᒥᔪᖓ ᕿᓚᒥᐅᔪᒥᑦ ᓯᕗᓕᖅᑎᐅᓂᐊᕋᒪ ᐊᒻᒪᓗ ᑭᒡᒐᖅᑐᕐᓗᒋᑦ ᐊᐅᓚᑦᑎᔩᑦ ᑲᑐᔾᖃᑎᒌᑦ ᐃᑲᔪᖃᑦᑕᖅᑐᑦ ᓄᓇᓕᒻᓂᑦ ᐊᒻᒪᓗ ᐃᓄᖕᓂᑦ.
“ᓴᙱᒃᑎᑎᕆᓇᓱᒋᔭᕋ ᓄᓇᓕᖕᒥᑦ,” ᐅᖃᐅᑎᔭᖏᑦ ᓄᓇᕗᒻᒥᑦ ᐱᕙᓪᓕᐊᔪᓕᕆᔨᒃᑯᑦ ᐊᐱᖅᓱᖅᑕᐅᖕᒪᑦ ᑕᒪᐃᓐᓄᑦ ᐊᒃᑐᖅᓯᓂᖓᑕ ᐃᓕᓴᖅᓯᕕᐅᑉ ᐱᖅᖁᓯᕆᔭᐅᔪᒃᑯᑦ ᐃᓕᓴᐃᓂᖏᓐᓂᑦ ᓲᕐᓗ ᑲᒥᓕᐅᕆᓂᕐᒥᒃ.
“ᓴᙱᓂᖅᓴᐅᓕᕋᓱᒋᔭᕋ ᑐᕌᖓᔪᑎᒍᑦ. ᖃᐅᔨᓯᒪᔪᖓ ᐃᓄᐃᑦ ᑲᑎᖃᑦᑕᖅᑐᓂᒃ ᐊᓯᐊᑕ ᐊᖏᕐᕋᖓᓂᑦ ᐃᓱᒪᒃᑯᑦ ᐊᒃᓱᕈᕈᑎᖃᖅᑐᑦ ᐊᒻᒪᓗ ᑎᒥᒃᑯᑦ ᐃᑲᔪᕐᓂᐊᕐᓗᒋᑦ.”
ᔩᐴᑎ ᐅᖃᐅᓯᕆᔭᖓ ᐅᖃᓪᓚᒍᖕᓇᕐᓂᖓ ᐃᓄᒃᑎᑐᑦ ᐃᑲᔪᐃᓂᖃᓗᐊᕐᓂᕋᖅᖢᒍ ᐃᖅᖃᓇᐃᔮᖓᓄᑦ ᓄᓇᓕᖕᒥᑦ ᐱᓕᕆᐊᕆᔭᖏᓐᓄᑦ. ᐅᖃᖅᖢᓂᓗ ᖁᕕᐊᒋᓛᕆᔭᖓ ᐃᖅᖃᓇᐃᔮᖓᓄᑦ ᐃᓚᒋᔭᐅᔪᖅ ᖃᐅᑕᒫᒃᑯᑦ ᓄᓇᓕᖕᒥᐅᖃᑎᒌᖕᓂᖏᑦ ᐃᒃᐱᒋᖃᑦᑕᖅᑕᖓ ᐊᐅᓚᑦᑎᔨᒃᑯᑦ ᑲᑐᔾᔨᖃᑎᒌᒃᑯᑦ 25-ᖑᔪᑦ ᖃᓂᑖᓂᑦ ᐃᖅᖃᓇᐃᔭᖅᑎᖏᑦ ᑲᑎᒃᑳᖓᑕ “ᐅᒃᑯᐃᖓᔪᒥᑦ ᐅᖃᐅᓯᕆᓂᐊᕐᓗᒋᑦ ᐃᓅᓯᕆᔭᕗᑦ.”