ᐅᓐᓃᑦ ᓄᓇ ᓴᐅᔭᐅᓯᒪᓕᖅᑎᓪᓗᒍ ᐊᐳᒻᒧᑦ ᐊᒻᒪᓗ ᑕᓰᑦ ᓯᑯᐃᓐᓇᐅᓕᖅᑎᓪᓗᒋᑦ, ᐃᑭᖅ ᓱᒃᑲᐃᓐᓂᖅᓴᒥᒃ ᓯᑯᖓ ᐃᔾᔪᓕᖅᐸᓪᓕᐊᓲᖑᖕᒪᑦ ᑕᕆᐅᖅ ᐃᖏᕐᕋᓂᖃᐅᕐᓂᖓᓄᑦ ᐊᒻᒪᓗ ᐊᐳᒻᒧᑦ ᐃᓚᖏᑎᒍᑦ ᕿᐱᒃᑕᐅᓯᒪᓕᖃᑦᑕᕐᒪᑦ, ᖃᐅᔨᒪᒐᑦᑕ ᑕᕆᐅᖅ ᐅᕿᖏᓐᓂᖅᓴᐅᖕᒪᑦ ᑭᐊᒃᑐᒥᑦ ᐃᒪᕐᒥᑦ ᑕᕆᐅᕐᒧᑦ ᕿᓂᕐᓂᖅᓴᐅᓕᖅᖢᓂ ᓯᑯ ᐃᔾᔪᓕᕐᓇᖅᓵᓱᖑᖕᒪᑦ ᐃᖏᕋᕕᒋᒋᐊᖅᓴᖅ ᐊᑯᓂ ᐊᑦᑕᕐᓇᖃᑦᑕᕐᒪᑦ.

Nunavut News columnist Harry Maksagak

ᑕᒪᑐᒪᓂ ᐅᔾᔨᖅᓱᖁᔭᐅᓕᓲᖑᔪᒍᑦ ᖃᐅᔨᒪᑦᑎᐊᕐᓗᑕ ᐊᒻᒪᓗ ᐅᖃᓪᓚᖃᑎᒋᕙᒃᓗᒋᑦ ᓄᓇᓕᑦᑎᓐᓂ ᖃᐅᔨᒪᔨᒋᔭᕗᑦ ᐊᖑᓇᓱᒃᑏᑦ, ᓄᓇᒧᖓᐅᖃᑦᑕᕐᒪᑕ ᓯᑯᒧᓪᓗ, ᐊᒻᒪᓗ ᐱᓗᐊᖑᐊᖅᑐᒥᒃ, ᐃᓐᓇᖅᐳᑦ. ᐊᖑᓇᓱᒃᑏᑦ ᒥᑭᒋᐊᓐᓂᐊᖅᑏᓪᓗ ᐱᓇᓱᐊᖃᑎᒌᖏᓐᓇᕐᒪᑕ ᑐᓴᐅᒪᖃᑦᑕᐅᑎᓪᓗᑎᒃ ᖃᐅᑕᒫᑦ ᓄᓇᒥᖔᖅᑐᒥᒃ ᐅᑎᖅᑐᖃᕌᖓᑦ, ᑕᓯᕐᓂᓪᓗ ᐃᒪᕐᒥᓪᓗ.

ᓯᓚᐅᓪᓗ ᖃᓄᐃᓐᓂᖓᓄᑦ ᐅᑭᐊᒃᓴᓕᖅᑎᓪᓗᒍ ᐊᒃᑐᐊᓂᖃᕐᒥᖕᒪᑦ ᑕᕆᐅᕐᒥ ᓯᑯᕙᓪᓕᐊᓂᖓᓄᑦ. ᓄᑖᒥᒃ ᐊᐱᓪᓗᓂ ᕿᐱᒃᓯᒪᔫᔮᓕᓲᖑᖕᒪᑦ ᓯᑯᓂᑰᒐᓗᐊᖅ ᐃᔾᔪᓕᕐᓇᓵᓕᖃᑦᑕᕐᒪᑦ. ᐃᒪᐅᓪᓗ ᐊᐅᓚᓂᖓᓄᑦ ᓯᑯᓇᓵᓲᖑᒋᓪᓗᓂ ᑕᐃᒪᖓᓂᑦ ᐊᓄᕆᒧᓪᓗ ᐊᐅᓚᑕᐅᖏᓐᓇᖅᖢᓂ. ᐅᕙᒍᑦ ᑕᕝᕙ ᓄᓇᑦᑎᓐᓂᒃ ᐸᖅᑭᔨᐅᔪᒍᑦ, ᖃᐅᔨᒪᔪᒍᑦᑕᐅᖅ, ᓯᓚᐅᑉ ᐊᓯᔾᔨᖅᑕᕈᓯᖏᓐᓂᒃ, ᑕᒪᑐᒪᓂ ᐅᑭᐅᖑᕋᑖᖅᑐᓂ ᓂᕈᒥᖕᓂᖅᓴᐅᓕᕐᒪᑦ ᓯᓚ ᐅᑭᐊᒃᓵᒃᑯᑦ ᐅᑭᐅᒃᑯᓪᓗ ᓯᓚᓐᓂᐊᖅᑎᒃᑯᑦ ᑎᑎᖅᑲᖏᑎᒍᑦ ᑕᑯᔭᒃᓴᐅᔪᖅ ᐅᑭᐅᖑᓚᐅᖅᑐᓂ ᑎᑎᕋᖅᓯᒪᖕᒪᑕ.

ᑕᐃᒍᓯᐅᓕᖅᑐᖅ ‘ᓄᓇᕐᔪᐊᒥ ᐅᖅᑰᓯᕙᓪᓕᐊᓂᖅ’ ᐅᖃᐅᓯᑐᐃᓐᓇᐅᖏᒻᒪᑦ, ᐱᓪᓚᕆᒃᑑᖕᒪᑦ. ᓄᓇᕗᒥ ᓄᓇᓯᐊᒥᓗ ᐃᑯᒪᖅᑯᑎᖃᐅᖃᑦᑕᕐᒪᑕ ᐅᕐᓱᐊᓗᒃᑐᖅᑐᓂᒃ ᐊᐅᓚᐅᑎᓂᒃ ᐊᑐᖅᖢᑎᒃ, ᐳᔪᐊᕿᔪᑦ ᐊᒃᑐᐊᓂᖃᕆᕗᒍᑦ ᓄᓇᕐᔪᐊᒥ ᐅᖅᑰᓯᕙᓪᓕᐊᓂᖓᓄᑦ ᓄᓇᑦᑎᓐᓂ ᐊᕙᑎᑦᑎᓐᓂᓗ, ᐃᓱᒪᒋᖏᓪᓗᒋᑦ ᖃᓄᑎᒋ ᐃᒃᐱᖕᓇᕐᓂᖃᕐᒪᖔᑕ ᐆᒪᔪᓄᑦ ᐅᓐᓃᑦ. ᐊᒃᓱᐊᓗᒃ ᑕᒪᐃᑕ ᐅᓄᖅᓯᕙᓪᓕᐊᖕᒪᑕ ᓄᓇᒃᑰᔫᖃᖅᑐᑦ ᒥᑭᔫᑏᑦ ᐊᖏᔫᑏᓪᓗ ᖃᒧᑕᐅᔭᐃᓪᓗ ᐅᕐᓱᐊᓗᒃᑐᖅᑐᓂᒃ ᐊᐅᓚᐅᑎᖃᖅᑐᑦ, ᐊᒻᒪᓗ ᐊᒃᓱᓗᐊᖑᔫᔮᖏᑦᑑᒐᓗᐊᑦ ᐊᑐᓂ ᑭᓯᐊᓂᓕ ᐊᒥᓱᓄᑦ ᐊᑐᖅᑕᐅᓕᕌᖓᑕ ᐳᔪᐊᕿᓂᖏᑦ ᓄᓇᕐᔪᐊᒧᑦ ᐱᕈᖅᓰᕕᒃᑎᑐᑦ ᐊᓕᒍᓕᒃᑎᑐᑦ ᐅᖅᑰᓯᕚᓪᓕᕈᑕᐅᖕᒪᑕ ᐳᔪᐊᕿᔪᓄᑦ.

ᐅᖃᐅᓯᕆᖅᑲᐅᒐᒃᑭᑦ ᓯᕗᓂᖓᓂ, ᑕᒪᑐᒪᓂ ᐅᔾᔨᖅᓱᕆᐊᖃᕐᒃᓂᖅᓴᐅᓕᕐᓂᑦᑎᓐᓂᒃ ᑕᒪᐃᑕ ᑐᓴᐅᒪᔪᑎᓕᐊᕗᑦ ᐊᓯᑦᑎᓐᓄᑦ ᑐᓂᒑᖓᑦᑎᒍ ᐅᔾᔨᖅᓱᕆᐊᖃᕋᑦᑎᒍ ᐅᕙᑦᑎᓐᓄ ᐊᑦᑕᕐᓇᓕᕈᑕᐅᖁᓇᒋᑦ.

Leave a comment

Your email address will not be published.