Skip to content

ᐊᕐᓇᖅ ᐊᖑᓇᓱᒃᐳᖅ ᓯᕗᓪᓕᖅᐹᒥ ᓇᓄᕐᒥᓂᑦ

ᐅᒃᑐᐱᕆ 8 ᐱᓕᕆᕐᔪᐊᕐᓂᐅᔪᒥ ᐅᓪᓘᓚᐅᖅᐳᖅ ᑲᖏᖅᖢᒑᐱᖕᒥᐅᑕᒧᑦ ᐋᓐᔨ ᐋᓯᕙᒃᒧᑦᖁᑭᖅᓯᓚᐅᖅᐳᖅ ᓯᕗᓪᓕᖅᐹᖓᓂ ᓇᓄᕐᒥ.

ᑲᖏᖅᖢᒑᐱᐅᑉ ᐋᓐᔨ ᐋᓯᕙᒃ ᑕᑯᒃᓴᐅᑎᑦᑎᕗᖅ ᖃᓄᐃᓐᓂᕆᓚᐅᖅᑕᖓᓂ ᓯᕗᓪᓕᖅᐹᒥ ᓇᓐᓄᒐᓱᖕᓂᖓᓂ, ᐱᓕᕆᐊᖑᓚᐅᖅᑐᒥ ᐅᓪᓛᖓᓂ ᐅᒃᑐᐱᕆ 8−ᒥ.

"ᐊᑎᕋ ᐊᒧᔭᐅᓚᐅᖅᐳᖅ ᓇᓐᓄᒍᓐᓇᐅᑎᒧᑦ ᐅᒃᑐᐱᕆ 6−ᒥ ᐊᒻᒪ ᐊᐅᓪᓚᕆᐊᖃᓚᐅᖅᐳᖓ ᐅᒃᑐᐱᕆ 8−ᒥ," ᐅᖃᓚᐅᖅᐳᖅ ᐋᓯᕙᒃ. "ᖁᓱᕕᒡᔪᐊᓚᐅᖅᐳᖓ ᐊᒻᒪ ᑲᑉᐱᐊᓱᒐᓚᒃᖢᖓ ᖃᐅᔨᒪᒐᒪ ᐅᕙᓐᓂᑦ ᐊᖏᓂᖅᓴᐅᔪᒥ ᖁᑭᖅᓯᓂᐊᕋᒪ. ᐊᒻᒪ ᖁᕕᐊᑉᐳᖓ," ᐅᖃᓚᐅᖅᐳᖅ ᐋᓯᕙᒃ.

ᓴᑭᖓᓗ ᐱᖃᓐᓈᖓᓗ, ᐋᓯᕙᒃ ᐊᐅᓪᓚᓚᐅᖅᐳᖅ ᖃᓄᐃᓐᓂᐅᓂᐊᖅᑐᒥ ᐅᓪᓛᖑᔪᒥ.

"ᐅᓪᓛᕐᔪᐊᒃᑯᑦ ᐊᐅᓪᓚᓚᐅᖅᐳᒍᑦ 7-ᒥ ᐅᓪᓛᒃᑯᑦ ᓇᓐᓄᒋᐊᖅᑐᕋᓱᐊᖅᖢᑕ ᐊᒻᒪ ᓇᓂᓯᓚᐅᖅᐳᒍᑦ 11−ᒥ ᐅᓪᓛᒃᑯᑦ. ᑕᑯᓚᐅᖅᐳᒍᑦ ᓇᓅᑉ ᑐᒥᖏᓐᓂ ᐊᑯᓛᒥ, ᓄᓇᐅᑉ ᐊᑎᕆᔭᖓ ᐃᓄᒃᑎᑐᑦ, ᐊᒻᒪ ᓇᓄᖅ ᓇᓂᓚᐅᖅᐸᕗᑦ ᐸᒥᐊᓪᓗᐊᒥ."

ᐋᓯᕙᒃ ᐅᒥᐊᕐᒦᓚᐅᖅᐳᖅ ᓇᓄᖅ ᑕᑯᔭᐅᑎᓪᓗᒍ ᖁᑦᑎᒃᑐᒥ ᖃᖅᑲᒥᑦ. 12−ᖏᖅᓱᖅᖢᓂ ᖁᑭᕆᐊᓚᐅᖅᐳᖅ ᐅᒥᐊᕐᒥ, ᐱᖓᓱᓂ ᖁᑭᖅᓯᔪᓂᑦ. ᑕᐃᔅᓱᒪᓂ ᐅᓪᓗᖓᓂ ᒪᓪᓕᓚᐅᖅᐳᖅ, ᐅᖃᓚᐅᖅᐳᖅ.

"ᓴᑭᒐ ᐊᒻᒪ ᐊᑖᑕᒐ ᒪᔪᕋᓚᐅᖅᐳᑦ (ᓇᓄᕐᒧᑦ) ᐊᒻᒪ ᐊᔭᐅᖅᖢᓂᔾᔪᒃ ᐃᒪᕐᒧᑦ," ᐅᖃᓚᐅᖅᐳᖅ ᐋᓯᕙᒃ, ᐃᓚᒋᐊᖅᓯᓪᓗᓂ ᐱᖃᓐᓈᖓ ᐊᒻᒪ ᐊᒃᑲᖓ ᖃᓂᑦᑐᒧᑦ ᐃᓂᒧᐊᓚᐅᖅᐸᖓ ᐱᓚᒃᑕᐅᓂᐊᕐᓂᖓᓄᑦ, ᐅᕿᙱᓗᐊᓚᐅᕐᒪᑦ ᐅᓯᓇᓱᐊᕐᓂᕐᒧᑦ ᓄᓇᓕᖕᓄᑦ ᐃᒪᒃᑯᑦ.

ᓇᓄᖅ 9−ᓂ ᐃᓯᒐᓪᓗᐊᓂ ᐊᖏᓂᖃᓚᐅᖅᐳᖅ.

ᐱᓚᒃᑐᖅᑕᐅᒐᒥ, ᓇᓄᖅ ᐅᓯᓕᐅᔾᔭᐅᓚᐅᖅᐳᖅ ᓄᓇᓕᖕᓄᑦ ᖃᔅᓯᐊᕐᔪᖕᓂ ᒥᓂᑦᓂ ᐅᖓᓯᖕᓂᓕᖕᒧᑦ. ᓂᕿᖓ ᑐᓂᐅᖅᑲᖅᑕᐅᓚᐅᖅᐳᖅ ᓄᓇᓕᖕᓄᑦ.

ᐋᓯᕙᒃ ᓂᐅᕕᐊᒃᓴᖃᕈᒪᕗᖅ ᓇᓅᑉ ᐊᒥᖓᓂ, ᐊᒻᒪ ᕿᓂᖅᐳᖅ ᓂᐅᕕᖅᑎᒃᓴᒥᑦ.

ᐃᖅᑲᐅᒪᓪᓗᓂ ᐊᑐᕐᓂᕆᓚᐅᖅᑕᒥᓂᑦ, ᐋᓯᕙᒃ ᐅᖃᓚᐅᖅᐳᖅ ᐊᓕᐊᓇᐃᕐᔪᐊᓚᐅᖅᐳᖅ, ᑭᓯᐊᓂ ᓇᓐᓄᒐᓱᒃᑲᓐᓂᓛᙱᑦᑐᒃᓴᐅᔪᖅ.

"ᐊᔪᕐᓇᖅᑐᐊᓘᖕᒪᑦ ᐅᖅᓱᐃᔭᐃᓂᕐᒥ ᐊᒻᒪ ᐊᒥᓕᕆᓂᕐᒥᑦ," ᐅᖃᓚᐅᖅᐳᖅ.

ᐃᑲᔪᖅᑕᐅᕐᔪᐊᓚᐅᖅᐳᖅ ᐱᓕᕆᐊᖑᔭᕆᐊᓕᖕᒥ ᐱᔭᕇᖅᓯᓇᓱᐊᕐᓂᕐᒧᑦᐊᓈᓇᖓ, ᒪᕐᕉᒃ ᐊᖓᔪᖏᑦ ᐊᒻᒪ ᐊᓯᒃᑲᓐᓂᐊᓂ ᓄᓇᓕᖕᒥᐅᑕᒥᑦ.

ᐋᓯᕙᒃ 20−ᙳᕋᑖᓚᐅᖅᐳᖅ ᐅᓪᓗᐊᓂᑦ ᖃᔅᓯᐊᕐᔪᓂᑦ ᐊᖑᓇᓱᒋᐊᓚᐅᖅᑳᕋᑎᒃ, ᐅᒃᑐᐱᕆ 12−ᒥ. ᐅᖃᓚᐅᖅᐳᖅ ᐃᓕᑦᑎᓚᐅᖅᓯᒪᕗᖅ ᖃᓄᖅ ᖁᑭᐅᑎᓂᑦ ᐊᑐᕆᐊᒃᓴᖅ ᐅᓇᑕᖅᑐᒃᓴᙳᐊᓃᑎᓪᓗᒍ, ᐃᓚᐅᓕᓚᐅᖅᓯᒪᓪᓗᓂ 12−ᖑᑎᓪᓗᒍ. ᐋᓯᕙᒃ ᐅᖃᓚᐅᖅᐳᖅ 16−ᖑᓪᓗᓂ ᖁᑭᖅᓯᓚᐅᖅᓯᒪᕗᖅ ᓯᕗᓪᓕᖅᐹᒥ ᓂᕐᔪᑎᒥᒃ, ᐊᕿᒡᒋᕐᒥ.