ᐃᓕᓐᓂᐊᖅᑐᑦ ᐊᒻᒪᓗ ᓴᓇᔩᑦ ᑐᒑᓕᒃ ᐃᓕᓐᓂᐊᕐᕕᒡᔪᐊᕐᒥ ᖁᕕᐊᒋᔭᖃᓚᐅᖅᑐᑦ ᐅᑉᓗᒃᑯᑦ ᖁᕕᐊᓱᒃᑎᑕᐅᕈᓘᖅᑎᓪᓗᒋᑦ - ᐅᑉᓛᕆᔭᖓᓂᒃ ᐅᖃᖃᑎᒌᖅᑳᖅᖢᑎᒃ ᐊᒃᓱᕈᕐᓇᖅᑑᖃᑦᑕᖅᑐᒥᒃ ᐅᖃᐅᓯᖃᖅᖢᓂ ᐃᓅᓯᕐᒥᒃ ᑭᐱᓯᕙᒃᑐᑦ ᒥᒃᓵᓄᑦ - ᐃᓕᓐᓂᐊᕐᕕᒃ ᐃᓅᓯᕐᒥᒃ ᐃᓵᒃᓯᒪᓂᕐᒧᑦ ᖁᕕᐊᓲᑎᖃᓚᐅᖅᑐᑦ ᓇᐅᔮᓂ ᓯᑎᐱᕆ 28-ᒥ.
ᑐᒑᓕᖕᒥ ᐃᓕᓐᓂᐊᕐᕕᖕᒥ ᐃᓱᒪᑕᐅᑉ ᑐᖏᓕᖓ ᔪᓕᐊ ᒪᒃᕘᓴᓐ ᐅᖃᓚᐅᖅᑐᖅ ᐃᓅᓯᕐᒧᒡᒎᖅ ᐃᓵᒃᓯᒪᓂᕐᒧᑦ ᐱᓕᕆᓂᐊᓕᕌᖓᑕ ᓂᕆᐅᒋᔭᐅᑦᑎᐊᓲᖅ ᐃᓕᓐᓂᐊᖅᑐᓄᑦ ᓇᐅᔮᓂ.
ᑕᐃᑲᓂ ᐅᑉᓗᕐᒥ ᐃᓕᓐᓂᐊᖅᑐᑦ ᑲᑎᖅᑳᓚᐅᖅᑐᑦ ᐃᖃᐃᓕᓴᕐᕕᖕᒥ ᐃᓕᓐᓂᐊᕐᓂᓖᑦ 7-ᒥ 12-ᒧᑦ ᐱᒋᐊᕈᓐᓇᖁᑉᓗᒋᑦ ᖃᓄᐃᓕᐅᖅᑎᑕᐅᕈᓘᔭᕐᓂᐊᕐᓂᕐᒧᑦ.
“ᐊᒥᓱᑦ ᐃᓕᓐᓂᐊᖅᑐᑦ ᕿᐊᖃᑦᑕᓚᐅᖅᑐᑦ ᐊᒻᒪᓗ ᐃᕿᔾᔪᑎᕙᒃᖢᑎᒃ,” ᑕᐃᒪᓐᓇ ᐅᖃᖅᖢᓂ ᒪᒃᕘᓴᓐ. “ᐃᓕᓐᓂᐊᖅᑐᑦ ᖁᕕᐊᒋᔭᖃᑦᑎᐊᓚᐅᖅᑐᑦ ᐅᑉᓗᕆᔭᕐᒥ, ᐊᒃᓱᕈᕐᓇᖅᑐᐊᓗᖕᓂᒃ ᐅᖃᖃᑎᒌᒍᑎᖃᓚᐅᕋᓗᐊᖅᖢᑎᒃ”
Photo courtesy Julia MacPherson
ᖁᕕᐊᓲᑎᖃᕐᓂᖅ ᐃᓅᓯᕐᒥᒃ ᐃᑲᔪᖅᑐᖅᑕᐅᓲᖅ ᖁᕝᕙᖅᑎᖅᑕᐅᕙᒃᑐᕐᓗ ᓄᓇᕗᒥ ᐃᓅᓯᕐᒧᑦ ᐃᓵᒃᓯᒪᔪᒪᓂᕐᒧᑦ ᑲᑎᒪᔨᓄᑦ.
ᐃᓅᓯᕐᒧᑦ ᐃᓵᒃᓯᒪᔪᒪᓂᕐᒧᑦ ᑲᑎᒪᔩᑦ ᐊᑎᓕᐅᖅᑕᐅᖃᑕᐅᓯᒪᔪᑦ ᑎᒥᖁᑎᒋᔭᐅᑉᓗᑎᒃ ᑮᓇᐅᔾᔭᒃᓴᖅᑎᐅᙱᖦᖢᑎᒃ ᐃᓅᓯᕐᒥᒃ ᑭᐱᓯᖁᔨᙱᓐᓂᕐᒧᑦ ᐊᔭᐅᖅᑐᐃᔨᐅᔪᑦ ᑎᒥᖁᑎᒋᔭᐅᑉᓗᑎᒃ ᐃᖃᓗᖕᓂ ᓴᖅᑭᑎᑕᐅᓚᐅᖅᓯᒪᔪᖅ 2004-ᒥ ᑲᒪᒋᐊᖁᑉᓗᒋᑦ ᐃᓅᓯᕐᒥᓂᒃ ᑭᐱᓯᕙᒃᑐᑦ ᐊᒥᓲᓗᐊᓕᓚᐅᕐᓂᖏᓐᓄᑦ ᓄᓇᕗᒥ. ᐱᓕᕆᐊᒃᓴᕆᔭᖏᑦᑕ ᐃᓚᖓ ᐅᖃᐅᓯᐅᓯᒪᔪᖅ ᑎᒥᐅᔫᑉ 2016-ᒥ 2019-ᒧᑦ ᖃᓄᖅᑑᕈᒪᓂᕐᒧᑦ ᐸᕐᓇᐅᑎᖓᓂᒃ - ᐃᓅᓯᕐᒧᑦ ᐃᓵᒃᓯᒪᒋᒃᑯᑦ ᑲᑎᒪᔨᖏᑦ ᐱᓕᕆᓇᓱᒃᑐᑦ ᓄᓇᓖᑦ ᐊᑦᑕᓇᖅᑐᓂᒃ ᐱᑕᖃᙱᓐᓂᖅᓴᐅᖁᑉᓗᒋᑦ ᖃᓄᐃᓕᐅᕈᑎᒃᑯᑦ ᖁᕝᕙᖅᑎᕆᔾᔪᑎᒃᑯᑦ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᑐᖃᖏᓐᓂᒡᓗ.
ᐃᓅᓯᕐᒥᒃ ᐃᓵᒃᓯᒪᓂᒃᑯᑦ ᑲᑎᒪᔩᑦ ᐲᖅᓯᓇᓱᖃᑦᑕᕐᒥᔪᑦ ᑲᙳᒋᔭᐅᓂᖓᓄᑦ ᐃᓱᒪᒃᑯᑦ ᐋᓐᓂᐊᕐᓂᖃᖃᑦᑕᕐᓂᕐᒧᑦ ᐊᒻᒪᓗ ᐊᔭᐅᖅᑐᐃᓲᑦ ᐃᑲᔪᖅᑕᐅᖁᔨᑉᓗᑎᒃ ᐃᓱᒪᒃᑯᑦ ᐊᒃᓱᕈᕐᓇᖅᑐᒃᑰᖅᑐᖃᖅᑎᓪᓗᒍ.
ᒪᒃᕘᓴᓐ ᐅᖃᖅᖢᓂ ᖁᕕᐊᓱᑦᑎᐊᓚᐅᖅᑐᒡᒎᖅ ᓯᕿᓐᓂᖅᖢᓂᓗ ᑕᐃᑲᓂ ᐅᑉᓘᔪᒥ ᐃᓅᓯᕐᒧᑦ ᐃᓵᒃᓯᒪᔪᒪᓂᕐᒧᑦ ᐱᓕᕆᓂᖃᖅᑎᓪᓗᒋᑦ. ᐃᖃᐃᓕᓴᕐᕕᖕᒥ ᑲᑎᒪᖅᑳᖅᖢᑎᒃ ᓯᓚᓗ ᓂᒡᓕᓇᕐᓂᖃᖅᑎᓪᓗᒍ 7C-ᒥᒃ, ᐃᓕᓐᓂᐊᖅᑐᑦ ᐊᒻᒪᓗ ᓴᓇᔩᑦ ᖁᕕᐊᒋᔭᖃᓚᐅᖅᑐᑦ ᓯᓚᒥ ᐃᑯᐊᓛᖅᑎᑦᑎᔪᖃᓚᐅᕐᒪᑦ, Hᐊᒻᐸᑲᑐᖅᑎᑕᐅᑉᓗᑎᒡᓗ, ᑐᓴᕐᓈᖅᖢᑎᒃ ᐊᒻᒪᓗ ᐱᙳᐊᖅᑎᑕᐅᑉᓗᑎᒃ.
ᐊᒻᒪᓗᑦᑕᐅᖅ, ᐃᓕᓐᓂᐊᖅᑐᑦ ᑕᕐᕆᔭᖅᑎᑕᐅᓚᐅᖅᑐᑦ ᐊᓂᒌᒃ - ᓇᔭᒌᒃ ᑭᕙ ᐊᒻᒪᓗ ᑐᓐᓴᐃ ᕆᑦᕗᕐᔅ ᑐᒑᓕᒃ ᐃᓕᓐᓂᐊᕐᕕᒡᔪᐊᓕᐊᓚᐅᖅᑎᓪᓗᒋᒃ ᐅᐱᕐᖔᖑᓚᐅᖅᑐᖅ ᐱᖃᑕᐅᑉᓗᒍ We Matter ᐃᑲᔫᑎᒃᑯᑦ ᐱᔾᔪᑎᖃᑦᑎᐊᕐᓂᐅᑉ ᒥᒃᓵᓄᑦ.
ᐱᔾᔪᑎᖃᑦᑎᐊᖅᑐᒍᑦ ᐃᑲᔫᑎ ᑲᓇᑕᒥ ᑕᕐᕆᔭᐅᓯᐅᕐᓂᒃᑯᑦ ᐃᑲᔫᑎᖓ ᓄᓇᖃᖅᑳᖅᓯᒪᔪᑦ ᐆᒃᑑᑎᑦᑎᐊᕙᐅᔪᑦ ᐊᒻᒪᓗ ᑲᓇᑕᒥᐅᑦ ᐅᖃᐅᓯᖃᖅᑎᓪᓗᒋᑦ ᖃᓄᐃᑦᑐᒃᑰᖃᑦᑕᖅᓯᒪᖕᒪᖔᕐᒥᒃ ᓵᓚᖃᕐᓂᕐᒧᑦ ᐊᒃᓱᕈᕐᓇᖅᑐᓂᒃ.
“ᐱᕚᓪᓕᕐᓂᖃᓚᐅᖅᑐᒍᑦ ᑕᐅᑐᒍᓐᓇᓚᐅᕋᑉᑕ ᐅᖃᓪᓚᒃᑐᓂᒃ ᐃᑲᔪᖅᑐᐃᔪᓂᒃ ᐃᓕᓐᓂᐊᖅᑐᖁᑎᕗᑦ ᐃᓚᐅᖃᑕᐅᑉᓗᑎᒃ,” ᑕᐃᒪᓐᓇ ᐅᖃᖅᖢᓂ ᒪᒃᕘᓴᓐ. “ᐊᑐᓂ ᐃᓕᓐᓂᐊᖅᑐᑦ ᐱᕕᒃᓴᖃᖅᑎᑕᐅᓚᐅᖅᑐᑦ ᐅᐊᔪᓕᐅᖅᑕᐅᓂᕐᒧᑦ ᐅᖃᓪᓚᒍᓐᓇᖅᑎᑕᐅᑉᓗᑎᒃ ᐃᑲᔪᖅᑐᐃᓂᕐᒧᑦ ᓂᕆᐅᒍᓐᓇᕐᓂᕐᒧᓪᓗ, ᐊᒻᒪᓗ ᑕᕐᕆᔭᐅᓯᐊᑦ ᐋᖅᑭᒃᓱᖅᑕᐅᓚᐅᖅᑐᑦ ᐊᒻᒪᓗ ᐊᐅᓪᓚᖅᑎᑕᐅᑉᓗᑎᒃ ᐃᓕᓐᓂᐊᕐᕕᖕᒧᑦ ᐃᓕᓐᓂᐊᓕᓵᖅᑎᓪᓗᒋᑦ.
“ᐅᑕᖅᑭᓚᐅᖅᑐᒍᑦ ᐃᓅᓯᕐᒧᑦ ᐃᓵᒃᓯᒪᓂᒃᑯᑦ ᐅᑉᓗᖓᓂᒃ ᑕᐅᑐᖕᓂᐊᕐᓂᕐᒧᑦ ᑕᕐᕆᔭᐅᓯᐊᓂᒃ, ᐃᓕᓐᓂᐊᖅᑐᓪᓗ ᖁᕕᐊᓱᑦᑎᐊᓚᐅᖅᑐᑦ ᓴᕆᒪᓱᒃᖢᑎᒡᓗ ᐃᖕᒥᓂᒃ ᑕᑯᔭᕆᐊᒃᓴᖅ ᑕᕐᕆᔭᐅᓯᐊᒃᑯᑦ ᐃᖃᐃᓕᓴᕐᕕᖕᒥ.”